Kundër Tiranës është një ndeshje për krenari, shpresë e pak cinizëm, sepse gjërat janë pothuaj të vendosura në kohën kur kundërshtarit i duhet vetëm një pikë në gjashtë ndeshjet e fundit për tu shpallur kampion. E atëherë, përpos faktit se një fitore do të vlente prestigjin për ta mbyllur si të barabartë në raportin direkt me kampionët e ardhshëm, Duro nuk i ka fshirë shpresat, jo përderisa të ekzistojnë edhe një e vetme. Ajo që mbetet, është natyrisht edhe dëshira për ti prishur festën Tiranës, ndoshta jo përfundimisht, por të paktën duke ia shtyrë. Bardheblutë duan të përligjin supremacinë me një fitore në shtëpinë e rivalit direkt, përpara tifozëve bardhezinj. E Duro dëshiron ta evitojë këtë, duke i dhënë mbështetësve të tij një motiv për tu gëzuar.
Për ta bërë këtë ka në dispozicion të gjithë lojtarët, me përjashtim të Ujkës. Lojtari është i skualifikuar dhe për ta zëvendësuar tekniku ka tre alternative në mendje: Ziko Adeleke e Zylfiu, një nga të cilët do të formojë repartin me Mazrekajn e Guindon. Pikërisht kështu, sepse Zarubica nuk është ende gati për të nisur nga minuta e parë, por mund të preferohet me ndeshjen në vazhdim. Për pjesën tjetër, pa dyshime, me Dajsinanin që do të rigjejë para tij Roganovic, Velija, Ignjatovic e Velkoskin, ndërsa në mesfushë Shehu e Deliu janë të paprekshëm e do të kompletohen nga Ziko ose Spahiu nëse i pari preferohet në tridhëmbëshin ofensiv.
Një mungesë ka edhe Tirana, por ajo është shumë më problematike për Shehin, pikërisht për sfidën titull. Xhixha do të humbasë kështu kthimin në shtëpi, për tu ndeshur me ish-skuadrën që e bëri të njohur në futbollin që ka rëndësi. Sulmuesi ka problem me abdominalet, kështu që Shehi mund të kompletojë treshen përpara me Gjumsin, që do ti shtohet Devid e Seferit titullarë të palëvizshëm. Për prapavijën Shehi do t’i besojë të njëjtëve, Tosevski, Najdovski, Behirachte e Ismajlgeci, që i garantojnë ruajtjen më të mirë Bekajt. Edhe në mesfushë nuk duhet të ketë surpriza me Totre, Limajn e Tolin, me të cilët Shehi do të kërkojë të qepë në fanellë titullin e 26 kampion.
