Pas humbjes katastrofike në zgjedhjet e pjesshme të gjashtë marsit, Lulzim Basha u gozhdua sot në komente në një postim që bëri në Facebook për të uruar festën e gruas.
Poshtë postimit të Bashës vërshojnë dhjetra komente denigruese dhe përbuzëse për kryetarin, që shpartallimin e PD-së në zgjedhje e njeh si anomali dhe jo si disfatë.
Që prej humbjes katastrofike në zgjedhjet e pjesshme të gjashtë marsit, Lulzim Basha ka reaguar vetëm një herë duke thënë se nuk ka humbur asnjë garë dhe se është përballur me masakra elektorale. Zgjedhjet e së dielës i cilësoi si anomali.
Mes demokratëve pati një reagim të fortë kundër Lulzim Bashës kur ky i fundit largoi Sali Berishën nga PD më nëntë shtator. Megjithatë Basha dhe klani i tij brenda PD-së e refuzuan këtë thirrje shurdhuese të demokratëve për largimin e Berishës.
Pika që derdhi gotën ishte gjashtë marsi. Zgjedhjet bindën këdo përtej dyshimit të arsyeshëm se Basha nuk përfaqëson më shumicën në opozitë. Nëse fusim në ekuacion edhe refuzimin e Bashës për të reflektuar mbi disfatën katastrofike që pësoi PD-ja nën drejtimin e tij, reagimi i popullit opozitar domosdo do të ishte më i acaruar. Mjafton një vëzhgim i shkurtër mbi komentet poshtë urimit të tij naiv për ditën e gruas, dhe panorama bëhet edhe më e qartë.
Një tjetër pasojë e gjashtë marsit ishte shpërthimi i frymës kundër Lulzim Bashës brenda grupit parlamentar besnik të tij. Emra si Agron Gjekmarkaj, Grida Duma, Ervin Salianji, Flutura Açka, Ferdinand Xhaferri, Dash Sula e të tjerë, që e kishin mbrojtur me pathos prej muajsh në çdo dalje publike e studio televizive, tashmë atij i kërkojnë dorëheqjen.
©LAPSI.AL
