Porsa plasi konflikti në Ukrainë u tha menjëherë se do të kishte rritje të konsiderueshme të çmimeve sidomos për nënproduktet e drithrave dhe për energjinë. Por ajo që qytetarët shqiptarë po e prekin më nga afër ka të bëjë me rritjen e çmendur të çmimit të naftës, i cili po ngrihet përditë me nga 100 lekë të vjetra për litër.
Këtë të shtunë, në pikat kryesore të vendit nafta u shtit me 2300 lekë nga 1900 që ishte vetëm pak ditë më parë.
Në tregun ndërkombëtar çmimi për fuçi po i afrohet 120 dollarëve. "Në krahasim me nivelin e ulët prej rreth 148 lekësh, që arritën gjatë periudhës së pandemisë, nafta në vend është shtrenjtuar me 92 lekë për litër, ose rreth 55%" shkruante sot revista ekonomike Monitor.al.
Sipas analistëve ndërkombëtarë disa nga shkaqet e kësaj rritjeje galopante lidhen me krizën e Ukrainës. Nga frika e luftës një pjesë e konsiderueshme e investitorëve po kërkojnë të grumbullojnë në treg sasi sa më të mëdha nafte rrezervë. Ky ndryshim i raportit mes kërkesës dhe ofertës ka ndikuar drejtpërdrejtë në çmim. Kjo dyndje për të siguruar sa më shumë naftë vjen edhe nga parashikimi se si hakmarrje ndaj sanksioneve të perëndimit Rusia mundet të ndërpresë përkohësisht furrnizimin e Europës me gaz dhe naftë.
Një rol të madh kanë luajtur gjithashtu edhe vetë sanksionet që u vunë kundër Rusisë. Ndonëse BE për interesat e saj nuk e ka ndaluar eksportimin e hidrokarbureve nga ky vend kufizimi që i është bërë atij përmes sistemit të pagesave po luan shumë rol. Vendimi i perendimorëve për të përjashtuar një pjesë të mëdhe të bankave ruse nga platforma ndërkombëtare bankare Sëift, e ka vështirësuar mundësinë e pagesave për karburantet që vijnë nga ky vend.
Dhe ky mendohet të jetë vetëm fillimi, pasi sipas parashikimeve çmimet mendohet të rriten edhe më shumë javën që vjen gjë që mund të shtojë dyndjen në pikat e karburanteve sipas parimit; "po e mbushe plot sot kursen diçka për nesër".
Në këtë situatë alarmante që ka impakt mbi të gjithë ekonominë qeveria duket sikur nuk po merr asnjë masë për të ulur taksat apo akzizën që rëndon mbi karburantet. Madje në të kundërt ajo i ka dhënë edhe një shtytje të lehtë ngritjes së çmimeve. Sipas Monitor.al një takse të re, që parashikon indeksimin e akcizës me inflacionin, e ka fryrë çmimin me 1.33 lekë për litër pa TVSH.
©Lapsi.al
