Një termometër i Shërbimit Informues Meteorologjik të Siçilisë regjistroi temperaturën e 48.8 gradë celcius pranë komunës së Sirakuzës. Nëse të dhënat verifikohen të sakta pas analizave, ky do të jetë i nxehti rekord i regjistruar ndonjëherë në Europë, më shumë se në Athinën e vitit 1977 apo të një qyteze tjetër në Itali, në Katenanuova në vitin 1999.
Temperatura u regjistrua në qytezën e Floridia (në foto një prezantim i shkurtër i qendrës së qytezës siçiliane) dhe do të analizohet, nëse vërtet është një rekord i ri europian. Gjithnjë në Siçili, dje u kapën 47.4 gradë celcius në një qytezë tjetër, ndërsa temperaturat mbi 45 gradë celcius ishin të zakonshmne në të gjithë krahinën.
Sipas një koloneli të Aeronautikës Ushtarake të Shërbimit Meteorologjik të Italisë, Guido Guidi për momentin është e vështirë të përcaktohet nëse temperatura e regjistruar në disa stacione ka arritur vërtet nivelin e 48.8 gradëve.
Një nga stacionet që sinjalizuan vlerën prej 48.8 gradësh në Floridia, ishte ai i Shërbimit Informues të Siçilisë. Rekord apo jo, vlerat e shënuara janë një dëshmi e valës intensive të të nxehtit që ka goditur Italinë me temperature përvëluese, veçantërisht në Jug të vendit.
Pikërisht për këtë, qendra e qytezës ku jetojnë rreth 20 mijë banorë boshatiset në orët më të nxehta të ditës.
Por 11 Gushti, nuk ishte dita e vetme me temperatura përvëluese. “Në 29 Korrik ishim në 44 gradë, të nesërmen 47 gradë” thotë kryebashkiaku i qytezës, Marko Cariani, 24 vjeç për Corriere della Sera.
Në anën tjetër, një anticiklon i pagëzuar si Luçiferi nga meteorologët nuk ndalet. Në orët e ardhshme, rekordi (nëse konfirmohet) mund të rrëzohet sërish sepse në Siçilinë jug-lindore temperaturat mund të shkojnë deri në 49-50 gradë.
