Ndonëse publikisht përbetohen për rakordim të përbashkët në diplomaci, sidomos kur vjen fjala për qëndrimin ndaj Serbisë, Tirana dhe Prishtina duken më larg se kurrë njëra-tjetrës. Dhe kjo është parë sidomos në takimet e njëpasnjëshme që kryeministri i Kosovës dhe ai i Shqipërisë kanë pasur me presidentin serb, Aleksandar Vuçiç. Fillimisht ishte Albin Kurti ai që u takua në Bruksel me kreun serb të shtetit, në raundin e dytë të përpjekjeve për rivendosjen e dialogut. Kurti i kujtoi bashkëbiseduesit të tij gjenocidin sistematik ndaj shqiptarëve, vendosjen si prioritet të viktimave të pagjetura të luftës, si dhe këmbënguli në idenë e tij për të nënshkruar një marëveshje paqe dhe mossulmimi mes dy vendeve.
Ashtu sikurse pranuan të gjitha palët takimi shkoi si mos më keq. “Takimi i sotëm në Bruksel ishte shumë më i shkrutër, sesa ishte planifikuar, sepse palët nuk ishin dakord pothuajse për asgjë. Pas bisedimeve u dëgjuan madje edhe fjalë të rënda në adresë të njëri-tjetrit”, komentoi radioja gjermane
Deutche Welle.
Ndërsa Vuçiç duke folur për mediat serbe u shpreh se "këto bisedime nuk janë të vështira, por të tmerrshme”. Ai tha se pala kosovare është e orientuar nga e kaluara ndërsa, ajo serbe nga e ardhmja.
Lexo me tej:
Intervista në Le Monde/ Albin Kurti tregon se ç’bisedoi me Makronin për Kosovën
Por tre ditë më pas në takimin mes Ramës, Vuçiçit dhe Zaevit, në kuadër të “Zonës së Novi Sadit” (të ashtuquajtur Mini-Shengen) nuk u pa asnjë notë e tillë. Ndonëse Vuçiç kërcënoi sërish se “nëse dikush e njeh pavarësinë e Kosovës, në atë moment nisim fushatën tonë për tërheqje të njohjeve”, kryeministri shqiptar nuk foli asnjë fjalë.
Njohjet e reja të Kosovës përplasin Vuçiç me Erdogan
Rama u mjaftua ta kalonte në heshtje këtë takim i cili me sa duket shkoi në paqe të plotë. Madje ai mund të quhet edhe i frytshëm pasi u informua që palët do të takohen përsëri në datat 28-29 korrik, ku pritet të lidhen marrëveshje të reja për tregëtinë dhe lejet e punës mes Serbisë, Shqipërisë dhe Maqedonisë së Veriut.
“Kryeministri i Kosovës dërgon në kancelaritë ndërkombëtare provat se presidenti i Serbisë është antishqiptar i papenduar për krimet e të shkuarës.
Kryeministri i Shqipërisë dërgon në kancelaritë botërore mesazhin se presidenti i Serbisë është partner i pranueshëm për shqiptarët”, i komentoi këto dy ngjarje zyrtari i Vetëvendosjes Arbër Zaimi.
Rama qetëson Vuçiçin/ Sulmon padinë e Kosovës për gjenocid nga Serbia
Këto qëndrime tëdyfishta bëhen në një kohë kur roli i Serbisë është shqetësues edhe për analistë që e njohin mirë Ballkanin. Amerikani Daniel Serwer e konsideroi sërish Serbinë e Vuçiçit rrezik për rajonin dhe i bëri thirrje ShBA, BE dhe NATO-s që të reagojnë.
E në këtë sfond nuk mund të mos bëjë përshtypje fakti se dy shtetet shqiptare po ndjekin politika kaq të ndryshme ndaj Beogradit. Prishtina:luftarake, Tirana: vllazërore. Nëse të dyja së bashku nuk e kanë gabim, për faktin se nuk arrijnë të koordinohen, me siguri së paku njëra është në rrugë të shtrembër në qasjen që ka zgjedhur ndaj Aleksandar Vuçiçit.
©Lapsi.al
