Shtëpia e mirënjohur e ankandeve Christie's ka shitur këpucët e sportit të sulmuesit të Barcelonës Lionel Messi, ato me të cilat shënoi golin me numër 644 në karrierën e tij në Barcelonë, që theu rekordin e realizimeve për një ekip të vetëm, të mbajtur më parë nga braziliani Pele.
Goli rekord i Messit u shënua gjatë ndeshjes kundër Valladolid më 22 dhjetor 2020. Nëse kanë shërbyer për një gol rekord, natyrisht që do të meritonin edhe një cmim rekord. Këpucët e sportit të argjentinasit janë shitur në fakt në ankand për 125,000 stërlina dhe të ardhurat nga shitja do të shkojnë për spitalin universitar Vall d'Hebron në Barcelona.
