"Ky është futbolli. Në qoftë se t’i nuk arrin ta mbyllësh ndeshjen. Rezultati 1-0 asnjëherë nuk është i sigurt. Në pjesën e parë kemi pasur 3-4 situata të pastra për gol. Na vjen keq për golin e pësuar". Shpëtim Duro nuk gjen ngushëllim pas ndeshjes së barazuar me Apoloninë, që e pengoi të merrte, qoftë edhe provizorisht, vendin e parë në renditje. Laci dominoi ndeshjen, krijoi një pafundësi rastesh dhe u dënua në rastin e vetëm të ndeshjes për kundërshtarin që mori një 1-1 gati të pabesueshëm për atë që tregoi fusha. "Skuadra ka qenë dominuese totalisht sot - vazhdoi tekniku -. Me këto skuadra kanë lënë pikë edhe skuadra të tjera. Sot ishte e tmerrshme, që me këtë lojë me këtë situatë të dalësh barazim. Por, ky është futbolli. U ndëshkuam nga një moment pa pretendime fare".
Një rezultat që kthen në vëmendje mungesat e rëndësishme të Laçit, që në fakt deri tani ishin mbuluar në mënyrë brilante nga një Harmon në superformë: "Aktivizuam Shehun si sulmues i dytë, arriti të shënonte, krijoi edhe raste. Mungonte Nuabueze, Xhixha, Mazrekaj nuk është në 100%. Kur skuadra nuk luan mirë, të kujtohen mungesa, por në këto raste, nuk ka analizë, por më vjen keq që nuk mora 3 pikë".
Në fund, Duro ka dashur të shmangë komentin mbi gabimin flagrant të Sherrit që i hoqi nga duart fitoren, duke kujtuar se me rastet e shpenzuara skuadra do ta kishte suportuar edhe daljen e pastudiuar të portierit: "Nuk mund të korrigjoj asnjë gjë te skuadra te loja. Nuk mund të them asgjë për lojën sot. Nga fillimi deri në fund. Këto janë gjëra që ndodhin në futboll. Duhet ta kishim mbyllur më përpara ndeshjen, që të ishim më të qetë", përfundoi tekniku bardhezi.
