Tirana duhet të ngrihet në këmbë, pas humbjes me Kukësin, mes shumë problemesh formacioni e jo vetëm. Bardheblutë duhet të bëjnë pa teknikun Orges Shehin të izoluar me Covid ashtu si Najdovski e Torassa, të cilët gjithësesi nuk do të mund të merrnin pjesë në ndeshje, maqedonasi i skualifikuar e argjentinasi i dëmtuar. Sikur të mos mjaftojë përballë do të jetë kundërshtari që në harkun e një viti i ka mundur më shumë se kushdo tjetër.
Teuta nuk njeh humbje përballë tyre prej 7 ndeshjesh: 6 fitore dhe një barazim. Nga viti 2020 e deri më sot, Tirana ka fituar vetëm një ndeshje kundër dursakëve, e fundit në 2 shkurt 2020, kur fitorja vinte nga golat e Ngos dhe Torassas që bënë të pavlefshëm realizimin e L.Vilës. Martini kërkon të mbajë trendin ende, si mënyra e vetme për të sulmuar kreun. Ajo që shqetëson teknikun është mungesa e Sebino Plakut dhe Iran Jr, që vazhdojnë të jenë të dëmtuar. Lajmi i mirë është rikthimi në dispozicion i mbrojtësit Rustem Hoxha, që pritet të zbresë në fushë nga minuta e parë, duke u vënë krah Kuros, Arapit e Todorvskit, gjithnjë duke u bazuar tek dy stervitjet e fundit. Tekniku nuk ka ndërmend të ndryshojë formacionin fitues kundër Skënderbeut, me Aleksin e Avdylin përpara mbrojtjes e treshen E.Vila, Bregu e L.Vila në mbështetje të Krasniqit, sulmues i vetëm.
Tek Tirana kanë një ndryshim kursi, me Shehin që ka vendosur të kthehet në 4-3-3 me tre mesfushorë fizikë në qendër të fushës. Nëse në portë Bekaj mbrohet nga Toshevski, Hoxhallari, Behiratçe (debutim nga minuta e parë) e Ismajlgeci, mesfusha do të formohet me tre shkatërrues: Toli, Batha dhe Çelhaka. Sulmi nuk ka diskutime: Kale, Muçi e Seferi.
Këtë vit Tirana ka 26 pikë, duke qenë shumë poshtë në klasifikim, por vetëm shtatë pikë larg Europës dhe Teutës dhe për këtë qëllim e ka për detyrë të fitojë ndaj durrsakëve. Nëse dështon, u largohet dy vendeve të Europës, ndërsa në Kupë këtë sezon është eliminuar që në turin e dytë. Por edhe pse situata është krejt tjetër në kampin durrsak, janë ata që befasojnë me vendimin për të anulluar konferencën për shtyp që ishte programuar dje për në orën 14.00. Një vendim i cuditshëm i klubit, për më tepër kur bregdetarët vijnë nga dy suksese radhazi dhe janë vetëm një pikë larg Partizanit të vendit të dytë. Ndoshta për të mbajtur larg presionin, apo për të ruajtur fshehtësinë e kartave në duart e Martinit, por përpara Tiranës gjithcka është në heshtje në kampin durrsak.
