Leicester është befasuar në fund, në betejën e dy skuadrave që synonin të shqetësonin Everton në garën për vendin e parë. Foxes janë ndëshkuar nga një gol i Barkley në kohën shtesë, që i ka dhënë Aston Villa fitoren dhe mundësinë për të marrë kreun e klasifikimit në Premier League, duke qenë se tashmë është 1 pikë pas Toffies por me një ndeshje ende për të luajtur.
Vendasit kishin nevojë për një fitore në shtëpi, për të vazhduar momentin e mirë të formës, por pa Jamie Vardy ishte shumë e vështirë, kundër një skuadre në formë si Villans. Iheanacho nuk bëri dot diferencën, ndërsa formacioni i Dean Smith luajti një ndeshje të kujdesshme, duke tentuar të gjejë hapësirën për të goditur. Nuk pati sukses për 90 minuta, por pikërisht në fund të ndeshjes Barkley shënon golin e fitores për Aston Villa.
Dëshpërim për Brendan Rodgers që e sheh skuadrën e tij të mbetet në vendin e katërt me 9 pikë, katër larg Everton kryesues. Vendi i dytë për Aston Villa me 12 pikë në katër ndeshje dhe vetëm një larg skuadrës së Ancelotti që ka luajtur ndërkohë 5 ndeshje.
