Presidenti i Republikës Ilir Meta konfirmoi se do të kthejë për rishqyrtim në Kuvend, ndryshimet në Kodin Zgjedhor që më herët i ka quajtur anti-kushtetuese. Meta e njoftoi këtë në takimin me Komisionerin për Politikën e Fqinjësisë Europiane dhe Negociatat e Zgjerimit, Oliver Varhelyi.
“Duke u ndalur tek reforma zgjedhore, përcaktuar si kusht themelor për nisjen e negociatave të anëtarësimit, e informova Komisionerin se do të rikthej për rishqyrtim në Kuvend ndryshimet e njëanshme të Kodit Zgjedhor” – thuhet në një njoftim që shpërndau pas takimit zyra e shtypit e kreut të shtetit.
Meta ka mbështetur para diplomatit europian deklaratat që vijnë nga PPE.
“Duke mirëkuptuar kërkesën dashamirëse të Grupit të PPE në Parlamentin Europian për t’i dhënë edhe një mundësi Kuvendit një-partiak të tërhiqet nga minimi i procesit zgjedhor, me pasoja të rënda e afatgjata ndaj integrimit europian të Shqipërisë, uroj që pushteti të kthehet tek Marrëveshja konsensuale e 5 Qershorit” – thotë Meta.
Në njoftim nuk thuhet asnjë fjalë të shprehur nga komisioneri Varhelyi në takimin me Metën. ©LAPSI.al
