Në vizitën e tij në Tiranë, komisioneri për zgjerimin Oliver Varhelyi u prit edhe nga kreu i Partisë Demokratike Lulzim Basha. Ky i fundit e ka cilësuar shkelje të marrëveshjes së qershorit votimin në parlament të ndryshimeve në Kodin Zgjedhor.
“Me Komisionerin e Zgjerimit diskutuam dhe për reformën zgjedhore të miratuar në mënyrë të njëanshme dhe që shembi themelet mbi të cilat u arrit marrëveshja e 5 qershorit. Gjatë bisedës i bëra të ditur zotit Varhelyi se reforma zgjedhore është ndryshuar dhe miratuar në mënyrë të njëanshme, në shkelje të Kushtetutës” – thuhet në një njoftim që shpërndau zyra e shtypit e selisë blu.
Sipas të njëjtave burime, Basha është shprehur se PS duke e ditur se ndryshimet janë në kundërshtim me praktikat e mira të zgjedhjeve refuzoi marrjen e mendimit të OSBE/ODHIR.
“Për herë të parë në Shqipëri u shkelën praktikat konsensuale mbi të cilat janë kryer reformat zgjedhore deri më sot. Ky akt cenon rëndë standardin e zgjedhjeve, të cilat janë kusht i rëndësishëm për të ardhmen dhe integrimin e vendit” – thuhet në të njëjtin njoftim.
Por zyra e shtypit e Partisë Demokratike nuk ka dhënë detaje për përgjigjet që Basha ka marrë nga komisioneri evropian për shqetësimet e ngritura nga kreu i opozitës shqiptare. Në njoftim nuk jepen detaje as për aksionin opozitar përvec denoncimit të këtyre shkeljeve që po bën mazhoranca. ©LAPSi.al
