Kryeministri Edi Rama ka pritur në një takim përfaqësues të Sindikatës së Punonjësve të Shërbimit Shëndetësor të cilët një ditë më parë thane se do të mbanin një grevë 1-orëshe, pranë Qendrës Spitalore Universitare “Nënë Tereza”.
4 kanë qënë kërkesat kryesore të mjekëve, në këtë situatë pandemie që pritet të përkeqësohet me afrimin e dimrit dhe shfaqjen e gripit stinor. Ata kërkojnë shpalljen “Dëshmorë të Kombit” të kujdo personeli shëndetësor që humb jetën duke luftuar Covid-in, sigurimin e jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë. Po ashtu, kërkohet dhe rritje e trajtimit financiar të personelit shëndetësor, si dhe kushte optimale në punë për parandalimin e infeksionit.
Policia nuk e lejoi protestën për shkak të rregullave që ndalohen tubimet gjatë pandemisë, por menjëherë reagoi kreu i qeverisë, cili i ftoi në një takim përfaqësuesit e Sindikatës së Punonjësve të Shërbimit Shëndetësor. Krahas mjekëve, më herët kanë mbërritur në Kryeministri drejtori i QSUT, Enkelejd Joti dhe ministrja e Shëndetësisë, Ogerta Manastirliu.
