Rois Babasi, 22 vjeç, djali i ish-deputetit të Partisë Demokratike Ndriçim Babasi, ka lënë qelinë, 10 ditë pasi u la nën masën “arrest me burg”. Mësohet se Babasit, i ka mbaruar afatit i masës që Gjykata dha para dhjetë ditësh, dhe për pasojë është liruar.
Ditën që dha masën e arrestit, Gjykata shtoi se gjatë këtyre ditëve, do të punohej për të siguruar prova të tjera, në lidhje me përleshjen e ndodhur në zonën e ish-Bllokut, por siç duket, kjo gjë nuk është bërë dhe 22-vjeçari është lënë i lirë.
Ndërkohë vijon të jetë në kërkim, djali tjetër i ish-deputetit, Even Babasi, i cili akuzohet se ka plagosur me armë zjarri, 39-vjeçarin Gazmir Bushaj dhe për ‘armëmbajtje pa leje’.
Sherri mesnatën e 16 korrikut përfshiu disa djem biznesmenësh e ish-deputetësh në mesin e ish-Bllokut, pranë Vilës së ish-Diktatorit Enver Hoxha. Bëhet fjalë për Ervis Bajraktarin, Ritvan Toskajn, Fatmir Hysenbelliun bashkë me truprojën e tij, Gazmir Bushaj, dy djemtë e deputetit Tom Doshi dhe dy djemtë e ish-deputetit të PD-së, Ndriçim Babasi, Even dhe Rois Babasi.
I gjithë sherri nisi për një vajzë. Pamjet e kamerave të sigurisë së lokalit ku ishin ulur dy grupet kriminale, tregojnë se si ndodhi e gjithë ngjarja. Në pamje shihet sesi rreth orës 00:30 truproja i F.H., Gazmir Bushaj shkon me thikë dhe qëllon Rois Babasin, dhe në momentin kur tenton që ta qëllojë për herë të dytë, ai plagoset në këmbë nga Even Babasi, i cili shkon të mbrojë të villain dhe e qëllon 39-vjeçarin me “Bereta”.
Rois Babasi mori një plagë thike në krah dhe u shtrua në një spital privat ku iu komunikua edhe masa e sigurisë nga Gjykata. 39-vjeçari, u vu nën hetim pasi ka qëlluar me sende të forta të riun Babasi.
