Askush nuk duhet të nënvleftësojë askënd, në të kundërt rrezikon të surprizohet, gjë që mund ti kishte ndodhur fare mirë Lacit, në përballjen në shtëpi kundër Flamurtarit të parafundit e që ka rënë nga kategoria. Vlonjatët kanë luajtur me 10 lojtarë nga minuta e 22, ndërsa për të hapur rezultatin, që në fund tregoi 2-1, kurbinasit kanë patur nevojë për një penallti.
Bardhezinjtë kanë arritur të fitojnë me rezultatin 2-1 përballë Flamurtarit, në javën e 31 të Superiores. Mund të jetë i kënaqur për rezultatin dhe tre pikët e marrë Aramdno Cungu, por aspak për lojën që tregoi skuadra e tij. Kuqezinjtë me 10 lojtarë pas minutës së 22 kur u ndëshkua me të kuq braziliani Olivera, për gjest antisportiv ndaj Shehit kanë rezistuar edhe pas penalltisë që u akorduar në favor të Lacit në fillimin e pjesës së dytë.
Nuabueze nga pika e bardhë nuk gaboi, por Flamurtari nuk hoqi dorë nga ndeshja, duke barazuar provizorisht rezultatin me golin e Ardit Hoxhajt në minutën e 62. Vlonjati vazhdon të bëjë ndeshje të mira pavarësisht se nuk arrin dot ta ndihmojë skuadrën e tij të bëjë rezultat.
Pikërisht kështu, sepse Turkaj ktheu avantazhin për kurbinasit në të 77, duke i dhënë fitoren të tijvë, që tashmë ngjiten përkohësiht në vendin e 3 me 52 pikë, në pritje cfarë do të ndodhë me ndeshjet në Durrës ku Teuta luan me Skënderbeun dhe në Ballsh ku vendasit presin Partizanin.
