Probleme për Milan ende pa rinisur sezoni. Kuqezinjtë që sapo kanë rifilluar stervitjet e skuadrës kanë humbur Zlatan Ibrahimovic, që është detyruar të ndalet për shkak të një dëmtimi.
Sipas asaj që bëhet e ditur nga Milanello, suedezi ka ndjerë dhimbje në pulpë, kur ndeshja e kontrollit ishte drejt fundit. Sulmuesi ka kryer një sprint që i ka kushtuar tërheqjen muskulare, sipas asaj që dyshon stafi mjekësor i kuqezinjve.
Nëse do të ishte një tërheqje e muskulit binjak Ibra do të qendrojë jashtë fushave për 30-45 ditë. Nesër do të kryhen testet për të saktësuar shkallën e dëmtimit që, sipas burimeve brenda shoqërisë, nuk lidhet me tendinën e Akilit.
