Mund të jesh multimilioner, por në kohë pandemie paratë mund të jenë të pamjaftueshme. Kjo po ndodh me ish ministrin e jashtëm të Kosovës dhe shefin e AKR, Behgjet Pacolli, i cili po e kalon kohën e izolimit në shtëpinë e tij në Lugano. Por kur mori vesh se votat e tij mund të jenë vendimtare për krijimin e një qeverie të re nga LDK, Pacolli ka tentuar të kthehet në Kosovë.
Me nuhatje prej biznesmeni, ashtu siç kishte vepruar edhe kur u krijua koalicioni PAN, Pacolli e ka kuptuar peshën edy votave që ka në parlament. Që qeveria e ardhshme të votohet duhen minimumi 61 vota. LDK edhe pse ka 28 deputetë, mund të llogarisë vetëm në 24 deputetë pasi Vjosa Osmani, Fatmir Rexhepi, Haxhi Avdyli e Ardian Shala nuk do ta votojnë një qeveri Hoti. 24 votat e LDK-së, 13 të AAK-së, 10 të Listës Serbe, 4 të Nismës dhe 9 të minoritetit joserb (deputeti Elbert Krasniqi ka paralajmëruar votën kundër), në total 60 vota, janë të pamjaftueshme.
Për formimin e Qeverisë së re, nevojitet të paktën edhe një votë nga AKR. Pikërisht për këtë mendohet se sot Pacolli ka tentuar që të niset me aeroplanin e vet privat në Kosovë. Por, atij disa herë është anuluar fluturimi. Nëse rikthehet në Kosovë, Pacolli duhet të mbyllet për 14 ditë në karantinë sipas ligjit. Pra ndonëse ka çarter në dispoziicion, ndonëse për të mund edhe të hapet kufiri, këtë herë liderin e AKR e pengon karantina për të siguruar një pazar të favorshëm politik për veten.
©Lapsi.al
