Këtë të martë në mbrëmje "vëllezërit armiq" të koalicionit të djeshëm, kryeministri në detyrë Albin Kurti dhe shefi i LDK-së Isa Mustafa përpos sfidës politike do të jenë në garë edhe për më shumë audiencë. Ata kanë zgjedhur ekranet që i kanë më paranë vetes për të dhënë intervista. Kurti ashtu sikurse ka njoftuar vetë në Facebook do të jetë në emisionin DESK, në KTV përballë gazetarëve Agron Bajrami e Brikenda Rexhepi. Sipas asaj që ka marrë vesh Lapsi.al Kurti do të flasë për vendimin e sotëm të Gjykatës Kushtetuese dhe për vendimin e tij për të qëndruar kryeministër në detyrë deri në zgjedhje të parakohshme. Avantazhi i tij do të jetë se "Desk" starton në ora 20 00. Ndërsa, treçerek ore më pas në RUBIKON të Klan Kosova, me Adriatik Kelmendin sonte do të diskutohet mbi zgjedhjet e jashtëzakonshme, mundësinë e ndryshimeve kushtetuese me qëllim të formimit të qeverisë pa shkuar në zgjedhje dhe shumë çështje të tjera me Isa Mustafën. Rubikon që është zhvendosur nga TV Koha, drejt Klan Kosova, fillon në ora 20:45.
©Lapsi.al
