Është folur shumë për kontrollin e pasurive të politikanëve shqiptarë, përmes një procesi të mirëfilltë vetingu, njësoj me atë që ndodh me gjykatësit, prokurorët dhe policët.
Deri më sot nuk ka asgjë të shkruar në letër, por Ministri i Brendshëm Fatmir Xhafaj mbështetës i fortë i dy proceseve të vetingut në gjyqësor dhe polici, ka paralajmëruar nisjen e një vetingu në politikë.
Deklaratën e bëri gjatë raportimit në Komisionin e Sigurisë kur tha:
“Nëse duhet një ligj i vetingut për politikanët, unë jam i pari që do ta votoja me të dy duart. Besoj që ai draft duhet të ketë që të vetohem unë i pari, meqenëse jam hartuesi i reformës në drejtë- si, hartuesi i këtij projektligji dhe Ministër i Brendshëm për momentin në këtë detyrë. Por besoj fort që në mënyrën si është ndërtuar dhe vetë reforma në drejtësi, në mënyrën se si është konceptuar ajo, unë besoj shumë shpejt që do të kemi dhe veting për politikën, qoftë për çështje të figurës, qoftë për çështje të njerëzve në politikë. Dhe në mënyrë të veçantë të atyre që kanë pasur rol vendimmarrës, në fatet e këtij vendi dhe në pasuritë e qytetarëve të këtij vendi”
Deklarata e Fatmir Xhafajt nuk ka asnjë bazë ligjore dhe është hera e parë që artikulohet publikisht. Duke marrë parasysh pengesat e forta që kaloi vetingu i gjyqësorit duket krejtësisht e pamundur që politikanët të miratojnë një ligj, i cili t’i hapë rrugë kontrollit të imtësishëm të pasurive të tyre.
