Presidenti Ilir Meta po konsultohet me të gjithë paraardhësit e tij, nëse duhet t’ia japë plotfuqinë Ministrisë së Jashtme të negociojë marrëveshjen e re të kufirit detar me Greqinë apo jo.
Këtë të enjte është takuar me ish presidentin Sali Berisha. Nga deklaratat e mëparshme të Berishës është e lehtë të kuptohet se çfarë e ka këshilluar Metën.
Dyshimet janë se marrëveshja është mbyllur tashmë dhe negociatorët mblidhen vetëm për ta “noterizuar” atë. Dyshimet u përforcuan nga deklaratat e politikanëve grekë. Në përfundim të bisedimeve Bushati-Kocias, kryeministri grek Aleksis Cipras deklaroi se Greqia do të mbështesë hapjen e negociatave të Shqipërisë, ndërsa Ministri i Jashtëm grek Nikos Kocias ka dhënë detaje tashmë të marrëveshjes së arritur, siç ishte zgjerimi i kufirit grek në maksimumin e mundshëm në 12 milje.
Berisha ka akuzuar Ramën dhe Bushatin për tradhëti. Në një reagim të tij, Berisha e ka quajtur marrëveshjen një pazar.
"Ka bërë pazarin e kufirit detar me Greqinë, në të cilin ministri i Jashtëm grek thotë se ‘fituam zgjerimin e ujërave me 12 milje’. Të gjithë ata që mendojnë se kjo deklaratë është propagandistike, gënjejnë veten e tyre. Ministri grek e ka deklaratën 100 % të vërtetë. Marrëveshja jonë ishte ajo që të takon në linjën e mesit, në distance të baraslarguar. Marrëveshja e tij është; ‘po të jap thërrime, llokmën po e mbaj për vete’. S’mund ta kalojë atë marrëveshje, pa kaluar mbi trupat tanë. Asnjë cm sdo kalojë. Do e paguaj me çdo çmim” ka thënë Berisha.
