Kanë bërë përshtypje në mediat greke deklaratat e kryeministrit Edi Rama në Vizion Plus mbrëmjen e së enjtes.
“Kathimerini” shkruan se kryeministri shqiptar Edi Rama i ka thënë medias së vendit të tij se “çështja e të drejtave çame është një nga problemet më të mprehta në bisedimet midis Athinës dhe Tiranës”.
Duke pasur parasysh që Kotzias u ka thënë grekëve se “çështja çame” nuk është në tryezë, gazeta greke thotë se Rama hodhi poshtë pretendimin e Ministrit të Jashtëm grek se çështja nuk po diskutohet nga të dy palët.
“Kotzias e ka dëgjuar mirë. Pala shqiptare është duke kërkuar intensivisht çështjen Çame në tavolinë” – citohet Rama nga “Kathimerini”.
Gazeta vëren se Rama ka qenë i kujdesshëm në mënyrë që të mos ndikojë negativisht në çështje të tjera që të dyja palët duket të jenë afër marrëveshjes.
“Çamët besojnë se kanë të drejtën e pronës që kanë lënë në Greqi kur ata u dëbuan midis 1944 dhe 1945 gjatë Luftës së Dytë Botërore. Athina argumenton se çamët ishin bashkëpunëtorë me nazistët dhe nuk e konsiderojnë se ata kanë ndonjë pretendim të vlefshëm” – shkruan “Kathimerini”. ©LAPSI.al
