Për ekstradimin që iu bë Nezar Seitit, njeriut që siguronte logjistikën dhe mbante paratë e Habilajve ka reaguar edhe Prokuroria e Përgjithshme.
Në një sqarim të shkurtër për mediat, zyra e shtypit e Prokurorisë së Përgjithshme njofton se: “Në përgjigje të rastit "Seiti", do të fillojnë verifikimet”.
Por mediat duket se janë një hap para Prokurorisë së Përgjithshme për rastin në fjalë. Është zbuluar tashmë se Etilda Gjonaj, Ministre e Drejtësisë dhe Fatmir Xhafaj, Ministër i Brendshëm ia dërguan Nezar Seitin autoriteteve italiane në shkelje të vendimit të Gjykatës së Krimeve të Rënda.
Policia e shtetit sqaroi se urdhri erdhi nga Ministrja e Drejtësisë, Etilda Gjonaj, ndërsa kjo e fundit ia ka lënë fajin prokurorisë që nuk e kishte njohur zyrtarisht me vendimin e Gjykatës.
Për ekstradimin e Seitit drejt Italisë nuk ishin njoftuar as prokurorët e çështjes dhe as avokati i tij, Detar Hysi. Mosnjoftimi i tyre ngre dyshime të forta për arsyet e ekstradimit, që duket më shumë si një “rrëmbim” i të të burgosurit nga qeveria.
Dhe ndërkohë që prokurorët vazhdojnë me “verifikimet”, qelitë e burgut për çështjen Tahiri mbetën bosh. Nezar Seiti ishte i vetmi person i arrestuar në lidhje me këtë çështje, që pas lirimit të Orest Sotës nga burgu.©Lapsi.al
