Filmi i parë shqip i zhanrit horror pritet të ketë premierën në Skoci.
“Bloodlands”, me skenar e regji të Steven Kastrissios, do të jetë pjesë e kategorisë speciale të “Frightfest” në edicionin e radhës së festivalit “Glasgow Film Festival”. “Frightfest” është festivali më i madh i horrorit në Britani të Madhe dhe për më shumë se një dekadë bashkëpunon me festivalin në Glasgow ku prezanton filmat më të mirë të zhanrit horror nga mbarë bota.
“Bloodlands” shpalos historinë e një gruaje të thjeshtë e cila dhunohet, mbetet shtatzënë dhe stigmatizohet nga banorët e lagjes së saj.
Atë e dëbojnë në mal, duke e quajtur shtrigë. E lënduar, e urryer dhe e dëbuar kjo grua vendos që të shndërrohet në një shtrigë të vërtetë dhe të marrë hakun për krejt dhimbjen që i kanë shkaktuar. Më pas, afër vetes mbledh një grup njerëzish të cilëve shoqëria ua ka kthyer shpinën. Bëmat e saj janë fatale dhe njerëz të shumtë pësojnë nga rikthimi i saj. Ngjarja zhvillohet në Tiranë dhe familjet moderne tipike shqiptare bien pre e sulmit të vampirëve të udhëhequr nga shtriga.
