Presidentja e Komisionit Evropian, Ursula von der Leyen, do të nisë të mërkurën nga Tirana turin e saj të gjashtë vjetor në Ballkanin Perëndimor, ndërsa Komisioni Evropian ka zbuluar agjendën e vizitës që do ta çojë atë në katër vende të rajonit.
Sipas agjendës së publikuar më 29 shtator, von der Leyen do të vizitojë Shqipërinë, Kosovën, Malin e Zi dhe Maqedoninë e Veriut, me diskutimet të përqendruara te hapat e ardhshëm në rrugën drejt BE-së dhe procesi i integrimit gradual.
Në këtë proces, vendet e rajonit mbështeten edhe nga Plani i Rritjes i BE-së për Ballkanin Perëndimor, me vlerë 6 miliardë euro.
Von der Leyen do ta nisë turin në Tiranë, ku të mërkurën do të zhvillojë takime me Presidentin Bajram Begaj dhe Kryeministrin Edi Rama.
Presidentja e Komisionit do të vizitojë gjithashtu shkollën “Emin Duraku” në Tiranë, të rindërtuar pasi pësoi dëmtime nga tërmeti i vitit 2019, me financim të BE-së.
Të enjten, von der Leyen do të udhëtojë drejt Prishtinës, ku do të takohet me ushtruesen e detyrës së Presidentes, Albulena Haxhiu, dhe Kryeministrin Albin Kurti.
Më vonë gjatë së njëjtës ditë, ajo do të jetë në Podgoricë për takime me Presidentin Jakov Milatović dhe Kryeministrin Milojko Spajić.
Turi do të përfundojë të premten në Shkup, ku von der Leyen do të zhvillojë takime me Presidenten Gordana Siljanovska-Davkova dhe Kryeministrin Hristijan Mickoski.
Gjatë vizitave, presidentja e Komisionit do të inspektojë edhe projekte të financuara nga BE-ja në Kosovë dhe Maqedoninë e Veriut, ndërsa në Malin e Zi do të marrë pjesë në inaugurimin e Qendrës Kombëtare të Koordinimit për menaxhimin e kufijve.
Bosnja dhe Hercegovina dhe Serbia nuk janë pjesë e këtij turi. Sipas Komisionit, në dritën e zgjedhjeve të ardhshme parlamentare dhe të përgjithshme në këto vende, von der Leyen synon t’i vizitojë ato në një moment të mëvonshëm. /LAPSI.al
