Gjashtë persona janë arrestuar në kuadër të një operacioni policor në Prishtinë, nën dyshimin për përfshirje në një grup të organizuar kriminal që merrej me trafikimin dhe shpërndarjen e lëndëve narkotike.
Në mesin e të arrestuarve, sipas mediave në Kosovë, është edhe ish ministri i Kulturës, Rinisë dhe Sportit, Astrit Haraqija. Ai e mbajti këtë post nga radhët e LDK-së gjatë periudhës 2004–2007.
Gjatë kontrolleve të ushtruara në disa lokacione u sekuestruan rreth 1.6 kg kokainë, sasi marihuane dhe substancave të tjera narkotike, si dhe rreth 16 mijë euro para të gatshme në valuta të ndryshme.
Po ashtu, policia sekuestroi 6 makina, përfshirë Mercedes-Maybach, Porsche dhe Mercedes GLE, ora luksoze Rolex dhe Franck Muller, stoli të çmuara, telefona mobilë, pajisje elektronike, një armë zjarri dhe municion.
Vlera e kokainës së sekuestruar vlerësohet në rreth 111 mijë euro, ndërsa vlera e përgjithshme e drogës dhe aseteve të sekuestruara arrin në rreth 301 mijë euro.
Operacioni u zhvillua një ditë më parë, pas një hetimi të gjatë nga Drejtoria për Hetimin e Trafikimit me Narkotikë, në bashkëpunim me Agjencinë e Kosovës për Inteligjencë (AKI).
