Mes Zinedine Zidane dhe Kylian Mbappé është rikthyer qetësia. Sulmuesi francez e ka humbur ndeshjen kundër Italisë për shkak të një dëmtimi, por pas përjashtimit të tij kishin lindur shumë teori për pakënaqësi të mundshme me trajnerin e kombëtares. Flitej për një përplasje të ndodhur në dhomat e zhveshjes dhe për një përjashtim për arsye teknike, por dy ditë më vonë alarmi duket se është shuar dhe kundër Turqisë lojtari do të jetë rregullisht në fushë.
Mbappé rikthehet mes lojtarëve të gatshëm, siç njoftoi vetë Zidane në konferencën për shtyp: në ndeshjen e ardhshme nuk do të mungojë askush dhe trajneri i kombëtares dëshironte të jepte versionin e tij për ngjarjet që e përfshinë në prag të ndeshjes kundër Italisë, në përpjekje për të sqaruar situatën dhe për të shpjeguar mosmarrëveshjet.
Zidane sqaron marrëdhënien me Mbappé
Gjatë udhëtimit të Francës në San Siro, Mbappé e ndoqi humbjen nga tribuna, zyrtarisht për shkak të dëmtimit. Ai nuk ishte stërvitur në prag të ndeshjes, por mungesa e tij shkaktoi një çështje më vete për shkak të zërave që u përhapën: flitej për një përplasje me Zidane lidhur me pozicionin e tij në fushë, me mosmarrëveshje aq të forta saqë e kishin përjashtuar nga lista e të grumbulluarve. Por trajneri i kombëtares, në konferencën për shtyp, tregoi versionin e tij: “Nuk i kuptoj këto zëra, por nuk është problem. Për këtë arsye nuk kam ndërmend të hyj në detaje të çështjes. Kam marrëdhënien që një trajner ka me lojtarin e tij. Nuk mund t’i pengoj njerëzit të thonë atë që thonë, por janë marrëzira. Është për të ardhur keq dhe është mjaft bezdisëse”.
Lidhur me pozicionin e tij në fushë, temën që thuhet se shkaktoi përplasjen e pretenduar, Zidane nuk shprehet dhe ia lë vendimin fushës: “Nuk ka asnjë problem, nesër do të jetë me ne. Do të shihni se si do të luajmë. Këto janë çështje që i përkasin trajnerit”. Francës i duhet një pikë kundër Turqisë për t’u kualifikuar në çerekfinalet e Nations League dhe, me një fitore, mund të luajë për vendin e parë të grupit kundër Italisë.
