Dy trupa të pajetë janë gjetur pas zjarrit që përfshiu një banesë në fshatin Domen të njësisë administrative Postribë, në Bashkinë Shkodër, ndërsa dyshohet se viktimat janë dy fëmijë.
Sipas informacioneve paraprake, në momentin kur shpërtheu zjarri, brenda banesës ndodheshin nëna së bashku me dy fëmijët e saj. Fillimisht u gjet një trup i pajetë, që dyshohet se i përket njërit prej fëmijëve, ndërsa gjatë kërkimeve u zbulua edhe trupi i dytë.
Autoritetet dyshojnë se në banesë ndodhej edhe nëna, ndërsa kërkimet dhe verifikimet vijojnë për të sqaruar plotësisht rrethanat e ngjarjes.
Ndërhyrja e shërbimit zjarrfikës u vështirësua nga terreni i thyer malor. Banesa ndodhet rreth 30 minuta në këmbë larg rrugës automobilistike dhe, kur ekipet mbërritën në vendngjarje, objekti ishte pothuajse i shkrumbuar.
Shërbimet zjarrfikëse, policia dhe ekipet e emergjencës vijojnë punën në vendngjarje, ndërsa pritet një reagim zyrtar nga autoritetet për bilancin dhe shkaqet e zjarrit.
