
Deputetët e Partisë Demokratike, së bashku me kryetarin Sali Berisha, kanë braktisur sallën e Kuvendit në momentin kur kryeministri Edi Rama u ngjit në foltore për të mbajtur fjalën e tij. Demokratët u ngritën njëkohësisht nga vendet dhe u larguan, duke refuzuar të ndiqnin fjalimin e kreut të qeverisë gjatë seancës plenare ku po diskutohet projektbuxheti i vitit 2027 dhe Paketa Fiskale.
Largimi vjen në shenjë proteste ndaj projektbuxhetit, të cilin opozita e ka kundërshtuar, duke e cilësuar si një buxhet që favorizon korrupsionin dhe jo interesat e qytetarëve. Një ditë më parë, Berisha kishte paralajmëruar se demokratët do të votonin kundër projektbuxhetit, duke akuzuar qeverinë për mungesë transparence dhe konsultimi me bizneset dhe grupet e interesit. Seanca e sotme është parashikuar për shqyrtimin në parim të projektbuxhetit dhe ndryshimeve fiskale, të cilat prekin tatimin mbi të ardhurat, TVSH-në, taksat kombëtare dhe akcizat.