Joe Alwyn, ish-partneri i Taylor Swift, është vënë sërish në qendër të vëmendjes pasi raportohet se është parë në shoqërinë e aktores Sarah Pidgeon në New York.
Sipas blogut të njohur të thashethemeve Deuxmoi, Alwyn dhe Pidgeon janë parë së bashku në zonën Fort Greene të Brooklyn-it të mërkurën mbrëma, duke nxitur menjëherë spekulime për një lidhje të mundshme romantike.
Megjithatë, në raportim u theksua se edhe në raste të mëparshme Pidgeon ishte parë me aktorë të tjerë dhe më vonë rezultoi se bëhej fjalë për projekte profesionale. Kjo ka bërë që fansat të tregohen të kujdesshëm para se të nxjerrin përfundime.
Në rrjetet sociale nuk munguan komentet. Disa përdorues bënë shaka duke thënë se një lidhje e re e Alwyn mund të frymëzojë Taylor Swift për një album të ri, ndërsa të tjerë vlerësuan se çifti do të dukej shumë mirë së bashku.
Lajmi vjen në një kohë kur mediat po raportojnë për planet e ardhshme të Taylor Swift me partnerin e saj, Travis Kelce.
Joe Alwyn dhe Taylor Swift ishin në një lidhje për më shumë se gjashtë vjet, nga fundi i vitit 2016 deri në pranverën e vitit 2023. Ndarja e tyre ndodhi në kohën kur këngëtarja po niste turneun e saj rekord “Eras Tour”.
Burime pranë ish-çiftit kishin deklaruar në atë kohë se ndarja nuk ishte dramatike, por se marrëdhënia kishte arritur natyrshëm në fundin e saj.
Pas ndarjes, fansat e Swift spekuluan se disa nga këngët e albumit “The Tortured Poets Department”, përfshirë “So Long, London”, “loml” dhe “I Can Do It With a Broken Heart”, përmbanin referenca për historinë e saj me Alwyn.
Vetë aktori foli për ndarjen në një intervistë të dhënë në vitin 2024, duke e përshkruar fundin e një marrëdhënieje të gjatë dhe të përkushtuar si një proces të vështirë.
“Shpresoj që njerëzit ta kuptojnë sa e vështirë është të përballesh me fundin e një marrëdhënieje të gjatë dhe të dashur,” ishte shprehur ai.
Alwyn shtoi se vështirësia u rrit edhe më shumë nga fakti që ndarja u bë menjëherë objekt diskutimi publik, me mediat dhe rrjetet sociale që analizuan çdo detaj të jetës së tyre private.
Nga ana tjetër, Sarah Pidgeon është e njohur për ruajtjen e privatësisë së saj dhe deri më tani nuk ka konfirmuar publikisht ndonjë lidhje romantike. Aktorja 29-vjeçare ka fituar vëmendje të madhe së fundmi për interpretimin e Carolyn Bessette Kennedy në serialin e suksesshëm televiziv “Love Story”.
