Botërori po fillon, por mënyra se si Shtetet e Bashkuara kanë pritur disa kombëtare dhe kanë menaxhuar situata të caktuara po dominon debatin publik rreth turneut. Nga kontrollet e rrepta ndaj Uzbekistanit dhe Senegalit deri te dëbimi i arbitrit më të mirë afrikan të vitit 2025, Omar Abdulkadir Artan, situata po bëhet gjithnjë e më e tensionuar edhe për Iranin. Edhe muajt para mbërritjes së delegacionit iranian në SHBA për këtë Botëror kishin krijuar tensione të shumta.
Pjesëmarrja e Iranit në Kupën e Botës ishte për një kohë të gjatë e mbuluar nga pasiguria, për shkak të luftës në Lindjen e Mesme dhe shqetësimeve të lidhura me sigurinë. Por nuk mbaron këtu. Irani ishte i vetmi vend që mungoi në kongresin vjetor të FIFA-s në Vancouver në prill, pasi një delegacion i Federatës, ku përfshihej edhe presidenti Mehdi Taj, u kthye mbrapsht në kufirin kanadez.
Tashmë, tre ditë para nisjes së Botërorit, Irani akuzon publikisht Shtetet e Bashkuara me një deklaratë zyrtare, ku pretendon se SHBA-ja ka anuluar të gjitha biletat e rezervuara për tifozët iranianë që dëshironin të mbështesnin kombëtaren e tyre. Të tre ndeshjet e fazës së grupeve të Iranit do të zhvillohen pikërisht në Shtetet e Bashkuara.
Irani i kërkon FIFA-s të mbrojë parimet e neutralitetit
“Privimi i tifozëve iranianë nga qasja në biletat që u takojnë në mënyrë legjitime dhe zyrtare është një veprim në kundërshtim me frymën që rregullon garat ndërkombëtare dhe me parimin e barazisë mes vendeve pjesëmarrëse – thuhet në deklaratën e Federatës. Ky veprim ngre pikëpyetje serioze mbi ndërhyrjen e konsideratave jo sportive dhe politike në organizimin e ngjarjes më të madhe futbollistike në botë.” Federata iraniane i bëri gjithashtu thirrje FIFA-s që “të mbrojë parimet e neutralitetit, drejtësisë dhe rregulloreve të vendosura”.
Në deklaratë thuhet gjithashtu: “Më pak se tre ditë para fillimit të Botërorit 2026, Shtetet e Bashkuara kanë vepruar edhe një herë për të penguar praninë e tifozëve iranianë në stadiumet ku do të zhvillohen tre ndeshjet e fazës së grupeve të kombëtares.” Federata iraniane e futbollit theksoi se rregulloret e FIFA-s parashikojnë ndarjen e 8% të biletave për çdo ndeshje, të cilat më pas u shpërndahen federatave pjesëmarrëse për tifozët e tyre përmes kanaleve zyrtare.
Irani bëri të ditur se kishte nisur tashmë shitjen e biletave për ndeshjet e fazës së grupeve pasi kishte marrë kuotën e tij, aq sa disa tifozë i kishin blerë tashmë biletat. “Por, me një veprim të papritur, kuota e caktuar për Federatën Iraniane të Futbollit u anulua dhe, në rrethanat aktuale, federata nuk është në gjendje t’u sigurojë tifozëve të kombëtares qoftë edhe një biletë të vetme”, thuhet në pjesën përmbyllëse të deklaratës.
Kështu, Irani hap një debat të ri në prag të njërit prej Botërorëve më të tensionuar të viteve të fundit: “Një vendim në kundërshtim me frymën që rregullon garat ndërkombëtare dhe me parimin e barazisë mes vendeve pjesëmarrëse”.
