Pjesa e borxhit të brendshëm e mbajtur nga individët pësoi rënie të mëtejshme në tremujorin e parë të këtij viti.
Sipas të dhënave nga Ministria e Financave, në fund të tremujorit të parë 2026, individët zotëronin 16.75% të borxhit të brendshëm, nga 18.53% në fund të vitit 2025. Kjo shumë përfshin investimet me pjesëmarrje direkte dhe investimet e kryera nëpërmjet bankave tregtare.
Investimet e individëve në bono po ulen për të tretin vit radhazi, ndërsa pesha e individëve në strukturën e financuesve të borxhit të brendshëm publik ka arritur nivelin më të ulët që prej vitit 2018.
Rënia e interesit të individëve konfirmohet edhe nga ecuria e investimeve të reja gjatë periudhës. Sipas të dhënave nga Autoriteti i Mbikëqyrjes Financiare, për tremujorin e parë 2025 individët investuan 7.9 miliardë lekë në tregun primar të bonove dhe obligacioneve, në rënie me 15.4% krahasuar me një vit më parë.
Rënie u shënua edhe në numrin e transaksioneve, që zbriti në 2370, me një rënie vjetore prej 17.6%. Sipas llojit të instrumenteve financiare, rënia është shtrirë njëkohësisht si në bono, ashtu edhe në obligacione.
Shifrat e AMF-së tregojnë se vlera e blerjeve të bonove në tregun primar zbriti në 5.8 miliardë lekë, me një rënie vjetore prej 15.2%. Ndërkohë, investimi në obligacione arriti në 2.1 miliardë lekë, 15.9% më pak krahasuar me 3-mujorin e parë 2025.
Pjesa e portofolit të borxhit të brendshëm e mbajtur nga individët pati arritur nivelin më të lartë historik prej 20.4% në vitin 2023. Kjo u nxit nga rritja e shpejtë e yield-eve që pasoi valën inflacioniste në vitit 2022. Por, rënia e yield-eve gjatë dy viteve të fundit është reflektuar menjëherë në zbehjen e interesit të individëve për të investuar në titujt e borxhit qeveritar.
Yield-et e bonove dhe obligacioneve në përgjithësi kanë shfaqur një tendencë rënëse edhe në tremujorin e parë të vitit, falë gjendjes së mirë të likuiditetit në treg dhe kërkesës së lartë nga investitorët.
Sipas të dhënave nga Ministria e Financave, yield-i mesatar për të gjitha letrat me vlerë të borxhit të emetuara në tregun e brendshëm në fund të marsit 2026 ra në 4.19%, nga 4.23% që kishte qenë në fund të vitit 2025 dhe 4.42% që kishte qenë një vit më parë.
Duke përjashtuar portofolin e bonove të financuar nga Banka e Shqipërisë, yield-i mesatar ka arritur në 4.33%, nga 4.35% që kishte qenë në fund të vitit të kaluar.
Aktualisht, yield-i mesatar i borxhit të brendshëm ka arritur nivelin më të ulët që prej vitit 2022, kur kriza inflacioniste që nxiti konflikti në Ukrainë solli një rritje të fortë të normave të interesit në tregjet financiare. Ecuria e yield-it mesatar konfirmon një ecuri përgjithësisht në rënie të kostos së huamarrjes së qeverisë shqiptare edhe në tremujorin e parë të vitit.
Yield-i mesatar i borxhit ka pësuar rënie, megjithëse Ministria e Financave ka vijuar të rrisë maturitetin mesatar, nëpërmjet shtimit të peshës specifike të instrumenteve afatgjata në strukturën e huamarrjes së re./ E.Sh. Monitor
Burimi: Ministria e Financave
