Një klient i restorantit ku Britney Spears dyshohet se pati një “shpërthim nervoz” ka treguar detaje nga mbrëmja që e përshkroi si “shumë të vështirë” për këngëtaren.
Gazetari i showbiz-it Jeff Sneider tha për Page Six se ndodhej në restorantin Blue Dog Tavern në Los Angeles kur Spears mbërriti me dy persona të tjerë.
“Sapo u ul, filloi të bënte zhurma si lehje qeni dhe shpërthime të çuditshme,” pretendoi ai, duke shtuar se fillimisht nuk e kishte kuptuar se bëhej fjalë për Britney Spears derisa ajo hoqi syzet.
Sipas Sneider, këngëtarja ngrihej dhe ulej vazhdimisht nga tavolina dhe lëvizte nëpër restorant, ndërsa në një moment dyshohet se mbante një thikë në dorë pa e kuptuar.
“Nuk u ndjeva i kërcënuar, por situata ishte e çuditshme,” tha ai, duke shtuar se një grua tjetër në restorant ishte frikësuar dhe kishte menduar se Spears mund ta sulmonte.
Ai pretendoi gjithashtu se personat që shoqëronin artistenpërpiqeshin vazhdimisht ta qetësonin dhe ta bindnin të ulej në tavolinë. Sipas dëshmitarit, Britney Spears nuk konsumoi alkool gjatë darkës, por në një moment ndezi një cigare brenda restorantit, gjë që solli reagimin e stafit.
Nga ana tjetër, përfaqësuesi i këngëtares mohoi kategorikisht çdo pretendim se ajo kishte rrezikuar dikë.
“Kjo histori është ekzagjeruar jashtë mase. Britney po kalonte një darkë të qetë me asistentin dhe truprojën e saj. Ajo thjesht po tregonte një histori për qenin e saj që lehte ndaj fqinjëve,” tha përfaqësuesi.
“Atë thikë e kishte vetëm sepse po priste hamburgerin në gjysmë. Në asnjë moment nuk vuri askënd në rrezik.”
Ngjarja vjen vetëm pak javë pasi Spears përfundoi një program rehabilitimi pas arrestimit për drejtim mjeti nën ndikimin e alkoolit në muajin mars.
