Offset raportohet se ka kërkuar që foshnja e porsalindur e ish-bashkëshortes së tij, Cardi B, dhe lojtarit të NFL-së Stefon Diggs t’i nënshtrohet një testi atësie për të konfirmuar identitetin e babait.
Sipas raportimeve të TMZ, artisti i grupit Migos ka paraqitur kërkesën në kuadër të procedurave të divorcit me Cardi B më 25 shkurt. Megjithatë, një gjykatës e ka refuzuar këtë kërkesë.
Në të njëjtën kohë, gjykata ka miratuar një tjetër kërkesë të Offset për test ADN-je lidhur me një nga fëmijët e tjerë të këngëtares.
Fëmija në fjalë, i përshkruar në dokumente si “i porsalindur”, besohet të jetë djali që Cardi B dhe Stefon Diggs sollën në jetë në nëntor 2025, edhe pse emri i tij ende nuk është bërë publik.
Cardi B dhe Offset janë prindër të tre fëmijëve: Kulture (7 vjeç), Wave (4 vjeç) dhe Blossom (1 vjeç). Çifti nisi lidhjen në vitin 2017 dhe u martua në fshehtësi po atë vit, por marrëdhënia e tyre ka qenë e trazuar, me ndarje dhe ribashkime të shpeshta.
Këngëtarja e hitit “Bodak Yellow” paraqiti kërkesë për divorc në korrik 2024, duke shënuar ndarjen përfundimtare nga Offset. Pas ndarjes, ajo nisi një lidhje me Stefon Diggs në vitin 2025. Çifti konfirmoi romancën publikisht gjatë një daljeje në një ndeshje të NBA-së dhe më vonë njoftuan se prisnin fëmijën e tyre të parë së bashku.
Foshnja erdhi në jetë në nëntor 2025. Megjithatë, raportet e fundit sugjerojnë se marrëdhënia mes Cardi B dhe Diggs mund të ketë kaluar në krizë, pasi të dy hoqën njëri-tjetrin nga rrjetet sociale pas Super Bowl 2026.
Së fundmi, janë shfaqur edhe thashetheme për një ribashkim të mundshëm, pasi Diggs u pa në një nga koncertet e turneut të Cardi B në Washington.
