Këngëtari i njohur Usher ka folur hapur për mikun e tij Sean Combs, i cili aktualisht ndodhet në burg, duke theksuar se e sheh atë si një figurë me “trashëgimi” në industrinë e muzikës.
Gjatë një interviste për Forbes, artisti 47-vjeçar u pyet se cila është fjala e parë që i vjen ndër mend kur mendon për themeluesin e Bad Boy Records. Përgjigjja e tij ishte e shkurtër: “Trashëgimi.”
Usher pranoi se deklarata e tij mund të jetë e diskutueshme, por theksoi se nuk mund të injorohen kontributet e Combs në muzikë dhe biznes.
“Nuk kam asgjë negative për të thënë për Sean Combs, sepse përvoja ime me të nuk është ajo që ka parë bota,” tha ai.
Ai shtoi se shumë njerëz kanë përfituar nga puna dhe ndikimi i Combs, duke e cilësuar atë si një figurë të rëndësishme për sipërmarrësit dhe industrinë kreative.
“Ka kontribuar shumë si biznesmen dhe si dikush që ka transformuar kulturën në diçka konkrete,” u shpreh këngëtari.
Usher gjithashtu kujtoi kohën kur jetoi me Combs si adoleshent, duke e përshkruar atë si një mentor të rreptë, por nga i cili mësoi shumë për biznesin dhe industrinë e muzikës.
Ndërkohë, Combs u dënua vitin e kaluar me burg për akuza që lidhen me transport për prostitucion, ndërsa vazhdon të përballet edhe me disa padi të tjera. Ai ka mohuar akuzat më të rënda ndaj tij.
