"Dy njerëz që shkëmbejnë pështymë", një bashkëprodhim franko-amerikan ku interpreton edhe aktorja me origjinë nga Kosova Luana Bajrami, është shpallur fitues i çmimit “Oscar” në kategorinë Filmi më i Mirë i Shkurtër.
Çmimi u dha gjatë ceremonisë së Academy Awards që u mbajt më 15 mars 2026 në teatrin Dolby, në Los Anxhelos të Shteteve të Bashkuara.
Filmi është realizuar nga regjisorët Alexandre Singh dhe Natalie Musteata, të cilët gjatë fjalës së tyre pas marrjes së çmimit falënderuan Akademinë dhe ekipin e produksionit për mbështetjen ndaj një projekti që ata e cilësuan të pazakontë dhe krijues. Ata theksuan gjithashtu faktin se një pjesë e madhe e ekipit realizues ishte e përbërë nga gra.
Në fjalimin e saj, regjisorja Musteata përmendi edhe producentët dhe aktoret që kontribuuan në realizimin e filmit, duke veçuar aktoren Luana Bajrami dhe origjinën e saj nga Kosova.
Në këtë film, Bajrami interpreton një personazh në një histori të vendosur në një Paris të pazakontë, ku puthjet janë të ndaluara me ligj. Rrëfimi paraqet një realitet absurd dhe të ftohtë, ku personazhet përballen me rregulla të çuditshme dhe kufizime të pazakonta.
Filmi i shkurtër, me titullin origjinal francez “Deux personnes échangeant de la salive”, është një bashkëprodhim mes Francës dhe Shteteve të Bashkuara. Në këtë projekt kinematografik, Bajrami interpreton personazhin Malaises.
Për këtë sukses ka reaguar edhe Qendra Kinematografike e Kosovës, e cila e cilësoi pjesëmarrjen e aktores kosovare në një film fitues të Oscar-it si një moment të rëndësishëm për kinemanë e Kosovës.
Në njoftimin e saj, QKK thekson se prania e Bajramit në këtë projekt përfaqëson një arritje të veçantë për skenën filmike të vendit. “Pas sukseseve të vazhdueshme në skenën ndërkombëtare të filmit, Bajrami vazhdon të përfaqësojë me dinjitet talentin e artistëve kosovarë në industrinë botërore të kinemasë”, thuhet në reagimin e institucionit.
Luana Bajrami është një aktore dhe regjisore franko-kosovare e njohur për pjesëmarrjen e saj në produksione të ndryshme evropiane dhe për aktivitetin si autore filmash. Në karrierën e saj si regjisore ajo ka realizuar edhe filmat Bota jonë dhe Luaneshat e Kodrës, të cilët janë prezantuar në disa festivale ndërkombëtare dhe janë vlerësuar me çmime.
