Aktori Robert Carradine, i njohur për rolet në Revenge of the Nerds dhe serialin Lizzie McGuire, ka ndërruar jetë në moshën 71-vjeçare.
Sipas familjes, ai i dha fund jetës pas një beteje të gjatë me çrregullimin bipolar. Lajmi u konfirmua nga vëllai i tij, aktori Keith Carradine, i cili tha se familja dëshiron të rrisë ndërgjegjësimin për shëndetin mendor dhe të luftojë stigmën ndaj sëmundjeve mendore. Carradine ishte pjesë e një familjeje të njohur aktorësh, përfshirë babanë e tij, John Carradine, dhe vëllanë David Carradine.
Karriera e tij nisi në vitet ’70 me role në filma si The Cowboys me John Wayne dhe Mean Streets të Martin Scorsese. Ai u bë i famshëm botërisht me rolin e Lewis Skolnick në “Revenge of the Nerds”, film që pati sukses të madh në arkëtime dhe solli disa vazhdime.
Një brez i ri e njohu si Sam McGuire në “Lizzie McGuire”, ku luajti përkrah Hilary Duff. Pas vdekjes së tij, Duff dhe kolegë të tjerë si Jake Thomas ndanë mesazhe prekëse në rrjete sociale, duke e përshkruar si një njeri me zemër të madhe dhe humor të veçantë. Ai la pas tre fëmijë, mes tyre edhe aktoren Ever Carradine.
