Ioan Gruffudd ka dëshmuar në gjykatë se ish-bashkëshortja e tij, Alice Evans, e ka kërcënuar se do t’ia shkatërronte karrierën duke bërë akuza të rreme dhe “shpërthyese” kundër tij.
Aktori i filmit Fantastic Four ka nisur procesin gjyqësor për të rinovuar urdhrin e mbrojtjes që ai dhe bashkëshortja e tij e re, Bianca Wallace, kanë ndaj Evans. Ata pretendojnë se ajo i ka përndjekur dhe i ka sulmuar publikisht në rrjete sociale.
Sipas raportimit të Daily Mail, Gruffudd deklaroi në gjykatë se ish-bashkëshortja e tij kishte kërcënuar se do bëhej si “Amber Heard", duke iu referuar rastit të famshëm mes Johnny Depp dhe Amber Heard, ku Depp fitoi padinë për shpifje ndaj Heard në vitin 2022.
Ai pretendoi se gjatë një incidenti, pasi kishte çuar në shtëpi vajzat e tyre, Ella (16) dhe Elsie (12), Evans e kishte sharë me zë të lartë dhe kishte thënë se do ta shkatërronte, madje kishte bërë insinuata të rënda për sjellje të papërshtatshme ndaj fëmijëve. Gruffudd tha se ajo e kishte akuzuar për pedofili, përdorim droge dhe sjellje të çrregullt.
“Ajo më tha: ‘Nuk do të jesh më aktor, do të përfundosh duke lypur para’,” dëshmoi ai, duke shtuar se ishte i shqetësuar se mund të krijohej një skandal publik “më i madh se Brad dhe Angelina”.
Ai gjithashtu pretendoi se kërcënimet ishin shtrirë edhe ndaj Wallace, duke thënë se Evans kishte paralajmëruar se do të sajonte një krim të rremë për ta futur në telashe ligjore dhe madje për ta dëbuar nga vendi.
Çifti u nda në vitin 2021 dhe divorci u finalizua në 2023. Në vitin 2022, Gruffudd mori një urdhër mbrojtjeje trevjeçar ndaj Evans, të cilin tani po kërkon ta zgjasë. Ndërkohë, në korrik 2024, Evans i është drejtuar gjykatës duke pretenduar se ndodhet në vështirësi financiare dhe ka kërkuar rritje të pagesave për mbështetje financiare dhe fëmijët.
