Një fotografi e post-arrestimit të ish princit Andrew shtë varur në Muzeun e famshëm të Louvre-it në Paris nga një grup aktivistësh britanikë.
Organizata me bazë në Mbretërinë e Bashkuar, People Vs Elon, publikoi në TikTok momentin kur anëtarët e saj vendosën një kopje të vogël të imazhit në murin e galerisë prestigjioze. Nën fotografinë, ata kishin shkruar: “He’s Sweating Now” (“Tani po djersitet”), një referencë ironike ndaj deklaratave të mëparshme të Andrew se ai nuk djersitet.
Fotoja e përfolur e tregon ish-princin të ulur në pjesën e pasme të një makine SUV, pasi u lirua nga paraburgimi në Aylsham Police Station në Norfolk, ku kishte qëndruar për rreth 11 orë.
Në përshkrimin e videos, grupi shkroi: “They say ‘hang it in the Louvre’. So we did #princeandrew.”
Andrew u arrestua mëngjesin e 19 shkurtit, në ditëlindjen e tij të 66-të, nën dyshimin për “shkelje në ushtrimin e funksionit publik”. Oficerët e policisë mbërritën rreth orës 08:00 në Wood Farm, në pronën Sandringham të Mbretit Charles, ku Andrew ishte zhvendosur së fundmi.
Pas lirimit, policia konfirmoi se një “burrë në të gjashtëdhjetat nga Norfolk” ishte lënë i lirë nën hetim, pa përmendur emrin e tij.
Fotografia virale u realizua nga fotografi Phil Noble i agjencisë Reuters, i cili tregoi se arriti ta kapte momentin “më shumë nga fati sesa nga gjykimi”, pasi kishte ndjekur disa komisariate policie në përpjekje për të fotografuar largimin e Andrew nga paraburgimi.
