Hilary Duff ka reaguar për herë të parë lidhur me esenë virale të publikuar nga Ashley Tisdale, ku kjo e fundit rrëfeu se ishte larguar nga grupi i saj i nënave pasi dinamika ishte bërë toksike.
Megjithëse Tisdale nuk përmendi emra në shkrimin e saj për revistën The Cut, fansat vunë re se në të kaluarën ajo ishte fotografuar shpesh me Duff, Meghan Trainor, Mandy Moore dhe figura të tjera të njohura, duke nxitur spekulime në rrjet.
Në një intervistë për Los Angeles Times, Duff u shpreh se zhurma mediatike dhe interpretimet online nuk janë diçka e re për të.
“Unë e përjetoj këtë që prej moshës 15-vjeçare, kur filluan të më ndiqnin paparacët. Gjithçka dokumentohet dhe njerëzit mendojnë se e njohin jetën time dhe të gjithë personat në të,” tha ajo.
Aktorja 38-vjeçare shtoi se sot situata është përshkallëzuar nga rrjetet sociale dhe “kokat që flasin në TikTok”, të cilat, sipas saj, shpesh kërkojnë vetëm klikime.
“Është e vështirë, sepse ndonjëherë dikush e kap saktë situatën, e herë të tjera flitet pa ditur asgjë,” u shpreh Duff, duke theksuar se përpiqet ta injorojë zhurmën online, megjithëse “varet nga dita”.
Këngëtarja dhe aktorja theksoi se prioriteti i saj mbetet familja – bashkëshorti i saj, muzikanti Matthew Koma, dhe katër fëmijët e tyre.
“Të kthehem në shtëpi, të luaj futboll me familjen, të kujdesemi për gjërat e përditshme – kjo është arsyeja e jetës. Kur ndodhin gjëra të çmendura, unë thjesht kthehem në shtëpi dhe e qetësoj zhurmën,” tha ajo.
Në dhjetor 2025, Tisdale publikoi një blog me titullin “You’re Allowed to Leave Your Mom Group”, ku rrëfente eksperiencën e saj personale me një grup nënash që, sipas saj, kishte marrë një dinamikë “të shëmtuar” me sjellje tipike “mean girls”.
“Jo sepse nënat janë njerëz toksikë, por sepse dinamika mund të zhvendoset në një vend të shëmtuar,” shkroi ajo, duke shtuar se kishte vendosur të largohej pasi situata i kujtonte shkollën e mesme.
Ndërkohë, Matthew Koma duket se reagoi në mënyrë ironike në rrjetet sociale, duke publikuar një kopertinë të sajuar satirike që u interpretua nga ndjekësit si thumb ndaj Tisdale.
