Kandidati për të drejtuar SPAK, Klodian Braho gjatë intervistimit nga Këshilli i Lartë i Prokurorisë tregoi pikën e tij të fortë që janë hetimet për korrupsionin.
I pyetur nga anëtarja e KLP, Arta Mandro se çfarë do të merrte nga dy drejtuesit e kaluar, Altin Dumani dhe Arben Kraja, Braho tha: “Nga Dumani do merrja pro-aktivitetin dhe vendosmërinë. Edhe nga Kraja do merrja qetësinë në kryerjen e detyrës”.
Arta Mandro: A ka një pikë të fortë tuajën dhe një pikë të dobët?
Klodian Braho: Nuk mendoj se jam perfekt. Si pikë të fortë do përmend faktin që kam eksperiencë të gjatë në hetimet për korrupsion. Që në 2012 jam marrë veprën penale të lidhur me korrupsionin. Kam patur qetësinë dhe qartësinë e duhur, edhe maturinë në kryerjen e hetimeve. Këto i vlerësoj si gjë pozitive.
Sa i përket pikës së dobët, prokuroria nuk ka qenë si sot. As ne nuk kemi qenë të përgatitur për këtë komunikim publik, për këtë vëmendje publike. Mendoj që është një ndër pikat e mia të dobëta, do ti kushtoja rëndësi në të ardhmen, komunikimin me median. Ne si prokurori nuk kemi qenë të mësuar apo të përgatitur. Gjithmonë del drejtuesi, ai që përfaqëson. Prokuroret nuk e kanë pasur gjithmonë këtë mundësi dhe këtu ka vend për përmirësim.
Arta Mandro: Çfarë do të merrnit nga drejtuesit e mëparshëm?
Klodian Braho: Nga Dumani do merrja pro-aktivitetin dhe vendosmërinë. Edhe nga Kraja do merrja qetësinë në kryerjen e detyrës.
Arta Mandro: Çfarë nuk do merrnit prej tyre?
Klodian Braho: Të dy kanë ushtruara të njëjtën detyrë kur institucioni nuk ka qenë i njëjti. Në kohën e zotit Krajës institucioni duhet të ishte më aktiv. Edhe pse çështjet duan kohën e tyre. Në krahasim me zotin Dumani, duke vlerësuar punën e tij, do ti merrja anën e pro-aktivitetin, e kam të vështirë që nuk do të doja ta kisha. Nuk jam konformist, por po tregohem i sinqertë.
