Kreu i PD, Sali Berisha, u shpreh se arsyeja se përse kryeministri Edi rama nuk është në seancë dhe nuk ka pranuar interpelancën e kërkuar nga kreu i Mundësia, Agron Shehaj, por ia delegoi ministres Albana Koçiu, është sepse ka turp.
Ai u shpreh se që nga shpërthimi i skandalit “Balluku”, kreu i qeverisë dhe zëvendës ministrja e pezulluar pas akuzave për tunelin e Llogarasë dhe Unazën e Madhe, nuk guxojnë të dalin para shqiptarëve.
“Pas Lubisë ku e keni Ramën? E kuptoni ku jeni katandisur? Nuk goxojnë të dy të vijnë në Kuvend e të dalin para shqiptarëve. Ju keni rënë. Kot votoni kot sillni ligje e buxhete, ju keni marrë fund. Frika e tij ka kufi vetëm qiellin. Po zhvillohet një betejë që do t’ju sqaroj më vonë, por gjë në botë që të mbyllë dosjen e tij nuk ka”, tha Berisha.
Ditën e djeshme në një konferencë për mediat nga selia blu, kryedemokrati u shpreh se dosja e Ballukut dhe ajo e Ramës janë ndarë tashmë, ndërsa sot në Kuvend Berisha tha se po bëhet një betejë që dosja e Ramës të mbyllet, por se kjo nuk mund të ndodhë më.
