Aktorja Denise Richards, u rikthye këtë fundjavë në BravoCon me një mesazh të qartë për fansat e saj. 54-vjeçarja mori pjesë në panelin Bravo2Bravo të dielën, më 16 nëntor, së bashku me Brittany Cartwright, Luann de Lesseps dhe Kim Zolciak.
Rikthimi i saj vjen në një periudhë të vështirë personale, teksa Richards po kalon divorcin nga Aaron Phypers, me të cilin ishte e martuar për gjashtë vjet para se ai të paraqiste kërkesën për divorc në korrik. Richards u shpreh se është duke u ndjerë “mirë”, pasi pak ditë më parë gjykata i dha një urdhër mbrojtje pesëvjeçar kundër Phypers.
“Është një proces. Kam një sistem mbështetjeje të jashtëzakonshëm,” tha Richards për publikun. “Faleminderit shumë.”
Gjatë panelit, Denise foli edhe për presionin e jetës publike dhe të famës. “Të jesh në tabloide është shumë rraskapitëse,” tha ajo. “Kur përballesh për herë të parë me këtë, është shumë e vështirë… Në reality-tv, jeta jote personale është jashtë atje. Nuk mund të shtiresh sikur nuk po ndodh.”
Richards dhe Phypers janë paraqitur disa herë në gjykatë gjatë procesit të divorcit. Më 7 nëntor, Denise mori urdhrin e plotë të mbrojtjes pas akuzave se ai ka ushtruar dhunë fizike ndaj saj gjatë marrëdhënies.
Phypers, 53 vjeç, i ka mohuar të gjitha akuzat, duke deklaruar në gjykatë më 8 tetor se “kurrë nuk e ka lënduar fizikisht” dhe “kurrë nuk e ka kërcënuar”. Ai i ka quajtur akuzat “të dëmshme dhe të pabaza”.
Denise, ndërkohë, pretendon se ai i ka shkaktuar “të paktën tre goditje në kokë” përgjatë viteve, duke përmendur një incident që i shkaktoi një “sy të nxirë” — dëshmi që paraqiti në kërkesën e saj të paraqitur në korrik për urdhrin e përkohshëm të mbrojtjes.
Në një video të postuar në Instagram në gusht, Richards e përshkroi periudhën si “shumë, shumë, shumë të vështirë” dhe falënderoi fansat për mbështetjen dhe mesazhet inkurajuese. Ajo premtoi se do të flasë më shumë “kur të vijë koha e duhur”.
