Aktorja Marissa Bode ka reaguar ashpër pasi Ariana Grande u sulmua nga një person gjatë premierës së filmit “Wicked: For Good” në Singapor të enjten.
Bode, e cila luan Nessarose Thropp në film, publikoi një video në TikTok ku kritikoi ata që e justifikuan veprimin duke thënë se agresori ishte “thjesht një fans”.
“Në rregull, atëherë është fans… por edhe një humbës,” tha ajo në fillim të videos, duke shtuar se ka vite që flet ndaj shkeljes së hapësirës personale të artistëve.
Personi që iu afrua me vrap Grandes identifikohet si Johnson Wen, i njohur në rrjete sociale si “Pyjama Man”.
Ai madje publikoi vetë videon në Instagram, duke falënderuar këngëtaren për “momentin”. Wen deklaroi më pas se “është liruar pas arrestimit”, ndërsa autoritetet në Singapor e kanë akuzuar për sjellje të pahijshme në publik, sipas BBC.
Në video të shpërndara online, Grande shihet duke u tërhequr e frikësuar ndërsa burri i hidhet në qafë. Cynthia Erivo ndërhyri menjëherë duke e larguar dhe sigurimi e tërhoqi agresorin. Michelle Yeoh u pa teksa e ngushëllonte këngëtaren, e cila dukej e tronditur.
Bode shtoi se kjo ngjarje është pjesë e një problemi më të gjerë që prekin gratë në industrinë e argëtimit.
“Nuk mendoj se gratë – ose kushdo tjetër – duhet të pritet të reagojnë qetësi kur dikush i sulmon. Kjo pritshmëri është absurde,” tha ajo, duke theksuar se figurat publike shpesh tregohen të buta për të shmangur reagime negative.
Ajo përmendi edhe rastet e Chappell Roan dhe Rachel Zegler, të cilat janë sulmuar në rrjete sociale “thjesht sepse kanë një mendim”.
Ariana Grande nuk e ka komentuar publikisht incidentin. Në vend të kësaj, ajo publikoi disa foto nga premiera, duke shkruar “Faleminderit, Singapor. Ju duam.”
Ngjarja ka shkaktuar reagime të forta nga fansat, të cilët kanë dënuar sjelljen e Wen, duke rikujtuar edhe ndjeshmërinë e Grandes pas tragjedisë së Manchester Arena në vitin 2017, ku humbën jetën 22 persona dhe më shumë se 1,000 u plagosën.
“Wicked: For Good” pritet të dalë në kinema më 21 nëntor.
