Reperi i njohur amerikan Sean “Diddy” Combs raportohet se ka shpëtuar nga një sulm brenda qelisë së tij në burgun federal Metropolitan Detention Center në Brooklyn.
Sipas mikut të tij prej më shumë se 30 vitesh, Charlucci Finney, Diddy “u zgjua me një thikë në fyt”, duke përjetuar një moment tmerri. “Nuk e di nëse ai e luftoi personin apo erdhën rojat,” – tha Finney për Daily Mail. “E vetmja gjë që di, është se ndodhi.”
Finney beson se incidenti ishte më shumë një paralajmërim sesa një përpjekje për ta vrarë.
“Po të donte ta dëmtonte, ai do ta kishte bërë. Ndoshta ishte një mënyrë për t’i thënë: ‘Herën tjetër nuk do jesh kaq me fat.’” Miku i tij e përshkroi Diddy-n si “i pathyeshëm” dhe “një njeri me shpirt të madh, baba dhe mik i përkushtuar”.
Reperi 55-vjeçar ndodhet në burg që nga shtatori 2024, pas arrestimit për akuza të rënda për trafik seksual, prostitucion dhe organizatë kriminale. Në korrik të këtij viti ai u dënua me 4 vjet e 2 muaj burg, si dhe një gjobë prej 500 mijë dollarësh.
Në dosjen gjyqësore, avokatët e tij kanë pretenduar më herët se Combs ka qenë “nën mbikëqyrje të vazhdueshme për vetëvrasje” dhe se është kërcënuar nga një i burgosur tjetër me një teh të improvizuar.
Në letrën drejtuar gjykatës gjatë dënimit, Diddy shkroi se është “i kthjellët” dhe “nuk po i ikën më gabimeve të së kaluarës”. Megjithatë, ish-e dashura e tij, Cassie Ventura, e cila dëshmoi në gjyq, kërkoi një dënim të ashpër, duke e quajtur Diddy-n “abuzues dhe manipulator”, dhe shprehu frikën se ai mund të hakmerret pas lirimit.
