Në dokumentarin e ri “In Whose Mind?”, që sapo ka dalë në kinema, shfaqen pamje ë papublikuara më parë nga jeta e reperit Kanye West gjatë gjashtë viteve të fundit – përfshirë edhe momentet më të tensionuara me ish-bashkëshorten Kim Kardashian.
Në një telefonatë të vitit 2018, e cila transmetohet në dokumentar, Kim dëgjohet e përlotur teksa përpiqet të komunikojë me Kanye për mënyrën se si ai perceptohet nga njerëzit përreth.
“S’mund të fle. Kam qarë gjithë ditën,” i thotë ajo Kanye-t, sipas revistës People. “Është një makth që nuk po merr fund.”
Kanye, i njohur për deklaratat dhe qëndrimet e tij kontraverse në rrjete sociale dhe politikë, nuk i jep shumë rëndësi shqetësimeve të Kim. Në vend të kësaj, ai përgjigjet: “S’më intereson industria muzikore. As puna. Unë jam në një biznes skllavërie.”
Kim e kundërshton menjëherë këtë krahasim: “Vetëm sepse ke një punë dhe punon fort, nuk do të thotë që je skllav,” i thotë ajo.
Në një moment tjetër të telefonatës, që shfaqet në dokumentarin e Nicolas Ballesteros, Kim e paralajmëron Kanye-n për sjelljen e tij impulsive dhe marrëdhëniet me kompanitë dhe industrinë:
“Unë nuk jam për prishjen e urave me kompanitë,” shprehet ajo. “Do të zgjohesh një ditë dhe nuk do të kesh asgjë.”
Kjo deklaratë ndez zemërimin e reperit:
“Jo! Mos më thuaj kurrë që do të zgjohem një ditë dhe s’do të kem asgjë. Mos e thuaj kurrë një gjë të tillë!” – përgjigjet me ton të lartë Kanye, i cili u nda përfundimisht nga Kim në vitin 2021.
Dokumentari sjell gjithashtu një tjetër përballje të ngarkuar emocionalisht – këtë herë mes Kanye West dhe ish-vjehrrës së tij, Kris Jenner, ku diskutohet për shëndetin e tij mendor.
Gjatë bisedës, Kanye, i diagnostikuar me çrregullim bipolar në vitin 2016, deklaron: “Më mirë i vdekur sesa të marr medikamente.”
Kris, e përlotur, pranon ndikimin që ajo dhe familja mund të kenë pasur:
“Po. Po, e pranoj. Të kemi ndikuar. Dhe të dua shumë. Nuk dua që ti të jesh jo i përsosur. Dua që vajza ime të të dojë ashtu si ti dëshiron që ajo të të dojë.”
