Sam Asghari, ish-bashkëshorti i Britney Spears, duket se është i hapur për një martesë tjetër në të ardhmen. Në një intervistë të shkurtër për TMZ, 31-vjeçari tha se mundësia për një fejesë të re nuk është e përjashtuar, ndërsa ishte parë në Los Angeles bashkë me të dashurën e tij të re, agjenten e pasurive të paluajtshme Brooke Irvine.
Kur u pyet nëse çifti kishte plane për t’u fejuar “së shpejti”, Asghari u përgjigj:“Ndoshta, po... ndoshta.”
Ai gjithashtu pranoi se ka pasur biseda për fejesë me Irvine. “Jeta është për t’u jetuar, për të përjetuar dhe për t’u shijuar,” – shtoi Asghari.
Pas ndarjes me Spears në vitin 2023, Asghari u shfaq për herë të parë publikisht me Brooke Irvine gjatë një eventi bamirësie në Las Vegas në nëntor 2024. Në atë kohë, ai i tha revistës PEOPLE se ishte plotësisht gati për të ecur përpara dhe se e shihte jetën me pozitivitet.
“Duhet të qëndrosh me këmbë në tokë dhe të jetosh me të vërtetën tënde, jo me opinionet e të tjerëve,” – tha ai.
Asghari dhe Spears ishin bashkë për shtatë vite dhe të martuar për 14 muaj, para se ai të kërkonte divorcin më 16 gusht 2023. Ndarja u finalizua në maj 2024. Edhe pse nuk kishin fëmijë së bashku, Asghari kishte shprehur dëshirën për t’u bërë baba me këngëtaren.
Pas komenteve të Spears në Instagram – ku e quajti martesën e tyre “një shpërqendrim të rremë” dhe “vitet më të vështira të jetës” – ai reagoi duke thënë:
“Martesa jonë ishte shumë reale për mua. Mund të ketë qenë e shkurtër, por ishim bashkë shtatë vjet. E kam dashur dhe gjithmonë do ta dua. I uroj më të mirat.”
