Rosie O’Donnell ka kujtuar për herë të parë pas shumë vitesh se si u prish marrëdhënia e saj me Ellen DeGeneres dikur një nga miket e saj më të afërta.
E ftuar në podcastin “No Filter” të Kate Langbroek, aktorja dhe prezantuesja tregoi se në vitin 1997, kur Ellen u deklarua hapur si homoseksuale përmes serialit të saj “Ellen”, ajo e ndjeu të domosdoshme ta mbështeste publikisht.
“Nuk mund ta lija vetëm. Si një grua homoseksuale, nuk mund të sillesha sikur nuk isha njësoj si ajo,” tha O’Donnell, duke kujtuar shakanë e koduar që ndanë drejtpërdrejt në emisionin e saj për “të qenit libaneze,” e cila u kuptua vetëm nga komuniteti LGBTQ+.
Por sipas O’Donnell, pavarësisht këtij gjesti solidariteti, Ellen “kurrë nuk e vlerësoi atë moment.” Miqësia e tyre nisi të krisej, derisa ndodhi incidenti që e theu përfundimisht: në një intervistë me Larry King, DeGeneres tha: “Unë nuk e njoh Rosien. Nuk jemi mike.”
“Ky ishte një nga momentet më të dhimbshme të jetës sime në showbiz,” pranoi O’Donnell. “Nuk mund ta besoja. E kisha njohur për 30 vite, ajo kishte mbajtur në krahë foshnjat e mia, dhe të më mohonte publikisht… më shkatërroi.”
O’Donnell madje tregoi se bëri bluza për stafin e saj ku shkruhej: “I don’t know Rosie. We’re not friends.” si një formë ironie ndaj deklaratës së Ellen.
Prezantuesja shtoi se Ellen kurrë nuk i ka kërkuar ndjesë dhe se nuk ka pasur një shpjegim nga ana e saj.
“Ne nuk jemi të ngjashme. Nuk jemi emocionalisht të njëjta,” tha O’Donnell, duke nënvizuar se diferencat mes tyre u bënë të pakapërcyeshme.
