John Malkovich, ka folur për herë të parë publikisht rreth lidhjes së tij të bujshme me kolegen e tij, Michelle Pfeiffer, gjatë kohës që të dy ishin të martuar.
Në episodin e datës 3 shtator të podcast-it “Fashion Neurosis” nga Bella Freud, aktori 71-vjeçar u hap mbi marrëdhënien që pati me Pfeiffer gjatë xhirimeve të filmit të famshëm “Dangerous Liaisons” në vitin 1988.
“Nuk është diçka për të cilën kam folur ndonjëherë më parë,” tha Malkovich.
Ai shpjegoi se marrëdhëniet emocionale që krijohen gjatë punës në film mund të bëhen shumë të forta dhe, ndonjëherë, kalojnë kufijtë profesionalë.
“Në punën që bëj, krijohen lidhje emocionale shumë shpejt. Kjo është pjesë e procesit. Rrallëherë, ato lidhje shkojnë përtej punës,” u shpreh aktori.
Malkovich e përshkroi Pfeiffer-in, si një kolege shumë të çmuar:
“Ishte shumë argëtuese, prekëse, dhe me mua ishte jashtëzakonisht e drejtë,” tha ai. “Unë nuk isha i tillë,” shtoi më tej me ndershmëri, duke reflektuar për gabimet e së kaluarës.
Ai pranoi se lidhja e tyre ndikoi negativisht në marrëdhënien profesionale:
“Kam mësuar se një koleg i mirë është gjëja më e rrallë. Dhe kur ajo marrëdhënie shkon përtej punës apo miqësisë, zakonisht humbet. Dhe kjo është shumë e vështirë për t’u rikuperuar.”
Në kontrast me këtë përvojë, Malkovich solli si shembull marrëdhënien e tij profesionale dhe miqësore 33-vjeçare me aktoren Ingeborga Dapkunaite:
“Ne kurrë nuk e kaluam atë vijë. Dhe kjo është ajo që kam mësuar – që kur ndodh diçka e tillë, ndoshta nuk ka më kthim pas.”
Në kohën kur ndodhi afera, Malkovich ishte i martuar me aktoren Glenne Headly, nga e cila u divorcua po në vitin 1988 – të njëjtin vit kur u publikua edhe filmi. Headly ndërroi jetë në vitin 2017 në moshën 62-vjeçare.
Nga ana tjetër, Michelle Pfeiffer ishte e martuar me aktorin Peter Horton, me të cilin u nda po në vitin 1988. Pfeiffer nuk ka folur publikisht kurrë për lidhjen me Malkovich.
