Cardi B, e cila më 19 shtator publikon albumin e shumëpritur “Am I the Drama?”, ka treguar pse nuk pranoi të ngjitej në skenën e Super Bowl Halftime Show.
“Kam marrë ftesë për të performuar në Super Bowl, por e refuzova. Ndihem që më vonë, kur ta bëj, do të kem edhe më shumë hite, do jem më e përgatitur dhe do e ‘shkëlqej’ siç duhet,” – tha Cardi B për Billboard.
Në vitin 2019, reperja kishte pohuar se e kishte refuzuar gjithashtu këtë mundësi, për të mbështetur Colin Kaepernick, ish-yllin e NFL që u bë simbol proteste kundër racizmit dhe dhunës policore pasi refuzoi të ngrihej gjatë himnit amerikan.
Albumi i parë i Cardi B, “Invasion of Privacy” (2018), u bë një sukses i jashtëzakonshëm: qëndroi për 156 javë në listën Billboard 200, siguroi çmimin Grammy për Albumin më të Mirë Rap, dhe u bë albumi i parë në histori ku të gjitha këngët u certifikuan platini nga RIAA.
Reperja thotë se albumi i ri nuk do të ketë shumë bashkëpunime, por ato që janë përfshirë janë “shumë të forta”.
“Jam 100% e sigurt për këtë projekt. Nuk mendoj se ka diçka të ngjashme aty jashtë,” – shprehet ajo.
Sa i përket suksesit, Cardi B thekson se nuk i intereson vetëm një Grammy tjetër: “Për mua, suksesi do të jetë kur njerëzit në orën 3 të mëngjesit të flasin për albumin tim, sepse mezi presin ta dëgjojnë,” – përfundoi ajo.
