Aktorja e njohur Jenna Ortega ka zbuluar se po i kushton rëndësi të veçantë mënyrës sesi e menaxhon karrierën në Hollywood.
Në një intervistë për Vogue México dhe Latin America, ku ajo shfaqet edhe në kopertinën e muajit shtator, 22-vjeçarja foli hapur për përvojat si fëmijë aktore dhe frikërat që ka ndjerë në xhirime.
Para famës botërore me serialin e Netflix, Ortega ka interpretuar në “Jane the Virgin”, “You” (sezoni 2), “Iron Man 3”, “Insidious: Chapter 2”, “Richie Rich” dhe “Stuck in the Middle” në Disney Channel.
“Që në fillim të karrierës, nuk ndihesha e dëgjuar,” tha ajo. “Të jesh e re dhe e vendosur shpesh është e vështirë për njerëzit, sidomos kur je vajzë. Kam njohur gjithmonë çfarë do të thotë të mos kesh zë, dhe kjo më tremb.
Nuk dua të përjetoj më diçka të tillë. Për mua është e rëndësishme që ta përdor zërin tim në mënyrën më profesionale, efikase dhe të sjellshme të mundshme.”
Ortega pranoi se për shumë vite nuk dinte si të shprehej, pjesërisht edhe për shkak të disa eksperiencave profesionale të vështira që e bënë të tërhiqej dhe të bëhej e pasigurt për vendin e saj në industri. Ajo shtoi se një ambient pune duhet të jetë gjithmonë bashkëpunues, pasi “puna më e mirë lind nga idetë e një grupi njerëzish dhe një vizion kolektiv”.
Aktorja theksoi gjithashtu se fama i ka ndryshuar mënyrën e sjelljes, duke e bërë më të kujdesshme: “Isha një fëmijë shumë ekstrovert, por tani jam bërë më e rezervuar. Nuk është diçka negative, thjesht zgjedh fjalët me kujdes.”
Një tjetër pikë ku Ortega është veçanërisht e vëmendshme është mënyra se si flet për trashëgiminë e saj latine. Babai i saj është me origjinë meksikane, ndërsa nëna me rrënjë meksikane dhe portorikane.
E rritur në Indio, Kaliforni, në një komunitet spanjishtfolës, Jenna tha se kjo përbën një pjesë thelbësore të identitetit të saj: “Këto gjëra nuk zhduken dhe nuk ndryshojnë. Është thjesht ajo që unë njoh.”
