Pas vendimit të Presidentit të Francës Emmanuel Macron për të njohur shtetin e pavarur të Palestinës kanë ardhur menjëherë reagimet e para nga Izraeli. Në një deklaratë, kryeministri izraelit Benjamin Netanyahu tha se vendimi i Macron "shpërblen terrorin dhe rrezikon të krijojë një tjetër përfaqësues iranian, ashtu siç u bë Gaza".
"Një shtet palestinez në këto kushte do të ishte një pikë nisjeje për të shkatërruar Izraelin - jo për të jetuar në paqe pranë tij. Le të jemi të qartë: palestinezët nuk kërkojnë një shtet pranë Izraelit; ata kërkojnë një shtet në vend të Izraelit", - shtoi Netanyahu.
Ndërsa ministri izraelit i financave, Bezalel Smotrich, shkroi në frëngjisht në X se Macron i ka dhënë Izraelit një arsye "tjetër" dhe "më bindëse" "për të zbatuar më në fund sovranitetin izraelit mbi rajonet historike të Judesë dhe Samarisë dhe për t'i dhënë fund njëherë e përgjithmonë iluzionit të rrezikshëm të një shteti të vetëm".
LEXO EDHE: Macron: Në shtator Franca do të njohë Palestinën si shtet të pavarur
Ministri izraelit i mbrojtjes, Israel Katz tha se qëllimi i Francës për të njohur Palestinën si shtet ishte një “dorëzim ndaj terrorizmit”. “Në vend që të qëndrojë me Izraelin në këtë kohë prove, presidenti francez po vepron për ta dobësuar atë”, – shkroi Katz në X. “Ne nuk do të lejojmë krijimin e një entiteti palestinez që do të dëmtonte sigurinë tonë, do të rrezikonte ekzistencën tonë dhe do të minonte të drejtën tonë historike për Tokën e Izraelit. Jemi të gjithë të bashkuar për të parandaluar këtë rrezik të madh.”
Ministri izraelit i drejtësisë, Yariv Levin, tha se vendimi i Francës kontribuon për terrorin ndaj bëri thirrje për aneksimin e Bregut Perëndimor.
Ndërsa ish-kryeministri izraelit, Naftali Bennett, e quajti vendimin e Francës për të njohur një shtet palestinez një shenjë të “kolapsit moral” dhe jo të diplomacisë. “Ai shpërblen vrasjen masive dhe u thotë terroristëve islamistë: vrisni hebrenjtë dhe bota do t’ju japë një shtet”, tha ai, sipas gazetës “Haaretz”.
“Ky vendim i turpshëm do të hidhet në koshin e plehrave të historisë” - tha Amir Ohana, kryetar i Knessetit që akuzoi Macronin se ishte “bashkëpunëtor” dhe se vendimi dërgoi mesazhin se “terrorizmi ia vlen”. ©LAPSI.al
